Wararka, ayaa sheegaya in halkaasi Xalay saqdii dhexe ay ka billowdeen rabshado xoogan oo ay daba socdeen boobka loo geystay dukaamo ganacsi Soomaalida.
Boobka iyo Rabshadaha, ayaa yimid kadib markii mid ka mid ah ganacsatada ajaaniibta ah ee ka soo jeeda dalka Itoobiya uu toogasho ku dilay mid ka mid ah dadka deegaankaas oo la sheegay inuu ahaa ganacsade, inkastoo aan la sheegin sababta uu u dilay.
Waxaa sidoo kale lagu soo waramayaa in laba ka mid ah ajaaniibta ganacsiyada ku leh dalkaasi lagu dhex dilay goobtooda ganacsi oo ku taalay deegaanka KwaNobuhle ee gobolka Eastern Cape.
Rabshadaha iyo boobka Xalay ka dhacay deegaanka KwaNobuhle ee gobolka Eastern Cape, ayaa lagu boobay ilaa 7 dukaan oo la sheegay in sadax ka mid ah lahayeen muwaadiniin Soomaali ah, halka afarta kalana ay lahayeen Itobiyaan, waxaana la sheegay boobka kadib in lagu gubay goobihii ganacsiga.
Muddooyinkii la soo dhaafay, waxaa sii xoogeysanayay weerarada ka dhanka ah dadka ajaaniibta ah, gaar ahaan Soomaalida ku dhaqan Koonfur Afrika, kuwaas oo markasta la kulma tacadiyo dil iyo dhaawac loo gaysto iyo in lagu boobo hantidooda.
