Waxaa kale oo qoraalka Maxkamada sare lagu sheegay in maxkamaddu dhagaysatay dacwadaha sideed murrashax oo hore maxkamadda ugu soo gudbiyay dacwadahooga.
Qoraalka, ayaa waxaa kale oo lagu sheegay in Fadhigan ay Maxkamaddu ku dhagaysanaysay dhammaan dacwadaha uu u furnaa dadweynaha.
Sidoo kale, Qoraalka, ayaa lagu sheegay in dhagaysigii dacwadaha ee maanta ay ka soo qayb galeen kor-joogayaashii doorashada ee caalamiga iyo maxaliga ahaa.
Hoos ka akhriso warka ka soo baxay maxkamadda
Fadhigan waxaa Shirgudoominayay Guddoomiyaha Maxkamadda Sare garyaqaan Aadan Xaaji Cali, waxaana ku wehelinayay 9 garsoore oo kala ah ku-xigeenka guddoomiyaha Maxkamadda Sare Maxamed Cumar Geele, Cabdiqaadir Axmed Maxamuud, Cabdiraxmaan Xasan Nuur, Cabdiraxmaan Jaamac Hayaan, Axmed Diiriye Qaalib, Yaxye Cali Idiris, Maxamed Faarax Siciid, Cabdiraxmaan Xuseen Caynaan iyo Cabdilaahi Cabdi Aadam oo ay wehelinayso kaaliyaha Maxkamadda Dastuuriga ah Sahra Ismaaciil Cabdilaahi oo ay caawinayeen kaaliyayaasha kala ah Khadar Muuse Cabdi, Cabdisalaan Muuse Ducaale iyo Cumar Cabdiwahaab Siciid, ayaa maanta fadhi buuxa ku soo gabagabaysay dhagaysiga 8 dacwadood oo la xidhiidha natiijadii hordhaca ahayd ee golaha Wakiillada JSL, Sida qorshaha dhagaysiga dacwadaha maantu ahaa, waxa maxkamadda u qorshaysnaa dhagaysiga 9 dacwadood hase ahaatee waxa gunnaanadkii dhagaysiga dacwadaha soo xaadiri waayay hal murashax iyo qareenadiisii, taasi oo ka dhigaysa tirada la dhagaystay maanta 8 dacwadood, oo marka loo geeyo 14-kii dacwadood ee ay hore maxkamaddu u dhagaysatay noqonaya 22 dacwadood.
Fadhiga ay Maxkamaddu ku dhagaysatay dhammaan dacwadaha ayaa u furnaa dadweynaha danaynaya in ay dhagaystaan, sidoo kale dhagaysigii maanta waxa ka soo qayb galay kor-joogayaashii doorashada ee caalamiga iyo maxaliga ahaa.
Iyadoo maxkamaddu u eegaysa dacwadaha ay dhagaysatay xeerka doorashooyinka iyo xeerarka kale ee la hal-maala, waxay sida ugu dhakhsaha badan ku soo saari doontaa go’aan kama dambayn ah, si loogu dhawaaqo natiijada rasmiga ah ee golaha Wakiillada Somaliland.
