Hargeisa (Hargeisa Press) – Agaasimaha guud ee wasaaradda Horumarinta Caafimaadka Somaliland Dr. Maxamed Cabdi Xergeeye, ayaa shaacisay tirada Bukaannada Cisbitaaladda u Jiifa xanuunka Covid-19-

Agaasime Xergeeye ayaa hadalkan ka sheegay mar uu booqday Cisbitaalka Daryeel oo lagu dabiibo dadka uu soo rito xannuunka Covid-19.

Cisbitaalka Daryeel ayaa wakhtigan ay ku jiraan 13, bukaan ah oo u jiifa xanuunka Covid-19, sida uu sheegay Dr. Yuusuf Garaw oo ah agaasimaha Cisbitaalka Daryeel.

Agaasimaha guud ee wasaaradda Caafimaadka ayaa sheegay in booqashada ay u yimadeen Cibitaalka Daryeel ay la xidhiidho sidii loo dar-dar gelin lahaa wada shaqaynta Citaalka Hargeysa oo dadka xanuunka lagaga baadho iyo Cibitaalka Daryeel, isaga oo sheegay in Cibitaalka Hargeysa ay cudurka u jiifaan 11, qof, taas oo tirada guud ee bukaanada labadan dhakhtar ku jira ka dhigaysa 24, qof.

Agaasimuhu wuxuu ugu baaqay bulshada in ay qataan fariimaha Caafimaadka iyagoo ilaalinaaya masaafada kala fogaanta iyo Af-xidhka, waxaanu bulshada gaar ahaan dhalinyarada ugu baaqay in si gaara loo ilaaliyo dadka waaweyn ee Da’da ah iyo kuwa xanuunada la nool oo cudurkan u nugul.

Ugu dambayn wuxuu agaasimuhu sheegay in maanta uu dalka soo gaadhay tallaalka Covid 19, oo hor dhac ah, laguna talaali doono shaqaalaha caafimaadka ee la tacaalaya dadka uu xanuunkani asiibo.