Dawladda Sucuudi Carabiya ayaa la sheegay in ay Somaliland dib ugu soo celisay markab sida Xoolo ka badan 17000, Kun oo nee foo Adhi ah.
Xoolahan oo todobaadkii hore ka dhoofay dekedda magaalada Berbera ee Somaliland isla-markaana gaadhay dalka Sucuudiga, ayaa dib loo soo celiyey.
Waxaanu Marka sida xoolahaasi ku soo jeedaa dhinaca Somaliland gaar ahaana dekedda Berbera, iyadoo la filayo inuu maalmaha soo socda ku soo xidho.
Sidaana waxa sheegay Xuseen Jaamac Maxamed (Xuseen Dhuluh), oo ka mid ah ganacsada xoolaha dhoofisa oo shalay felefiishanka Horn Cable kula hadlay magaaladda Burco.
“Sida aad ogtihiin waxa Sucuudiga ka soo socda Markab rarran oo buuxa. Kaasi oo ka baxay Berbera toddobaadkan.
Markabkaasi wuxuu ku soo beegan yahay Somaliland oo Abaar ah, oo aan roobkii Dayrtu ka di’in, xoolahaasi waxay u baahan yihiin Biyo macaan iyo xanaano” ayuu yidhi Xuseen Dhuluh.
Ganacsade Xuseen Jaamac, ayaa ugu baaqay xukuumadda Somaliland in ay xoolahaasi aadka u faraha badan u diyaariso wixii Calaf iyo biyo ah ee ay u baahan yihiin.
Waxaanu yidhi, “Markaa xukuumadda Somaliland waxaanu leenahay, Markabkaa ha loo gurmado, sidii xoolahaa loo bedbaadin lahaa. Waana in ay xukuumadu u diyaariso Baad iyo biyoba xoolahaasi aadka u faraha badan”.
Geesta kale ma jiro ilaa hadda wax war ah oo ay xukuumadda Somaliland ka soo saartay xoolahaasi aadka u badan ee laga soo celiyay dalka Sucuudiga, oo la xidhiidha sababta uu Sucuudigu xoolahan u soo celiyay.
Sidoo kale dawladda Sucuudiga ayaan cadaynin sababta keentay in ay xoolahani aadka u badan dib ugu soo celiyaan Somaliland iyo sidoo kale inuu jiro wax Cudur ama xanuun ah oo ay qabaan xoolahaasi.
Dhinaca kale arrintani ayaa dhibaato iyo saamayn xun ku keenaysa ganacsatadda xoolaha nool dhoofiya ee reer Somaliland iyo sidoo kale dadka xoolo dhaqatadda reer baadiyaha ah oo noloshoodu ku tiirsan tahay xoolaha nool.
