Dawladda Norway ayaa la sheegay in ay qayb ka noqonayso wadahadaladda u dhexeeya jamhuuriyadda Somaliland iyo dawladda federaalka ah ee Soomaaliya.
Ka mid noqoshadda Norway ee wadahadaladda ayaa codsigeedu ka yimid dhinaca dawladda Norway, iyadoo Somaliland ka aqbashay dalabkaasi.
Maaddaama oo ay Somaliland u aragto waddanka Norway inuu yahay dal dhexdhexaad ah, isla markaana leh waayo-aragnimo dheer oo ku saabsan xallinta khilaafaadka iyo nabadda adduunka.
Sidaasina waxaa lagu sheegay war-saxaafadeed ka soo baxay madaxtooyadda Somaliland kadib uu maanta madaxweynaha Somaliland Muuse Biixi Cabdi, ku qaabilay wefti ka socday dawladda Norway.
Weftigaasi oo uu hogaaminayay safiir-ku-xigeenka dawladda Norway u fadhiya magaaladda Nairobi ee dalka kenya Amb. Stian Christensen.
Danjiraha waxaa safarkaasi ku wehelinayay ergeyga gaarka ah ee dawladda Norway u qaabilsan dalalka jamhuuriyadda Somaliland iyo Soomaaliya, Amb. Theidi Johansen.
Kulankan, ayaa intii uu socday lagaga wada hadlay arrimo dhawr ah oo ay kamid yihiin xoojinta xidhiidhka labada dal, iskaashiga horumarka iyo wada-hadallada Somaliland iyo Soomaaliya iyo kaalinta uu dalka Norway ka qaadan karo.
“Waxaanay jamhuuriyadda Somaliland soo dhawaysay in Norway kaalin ka qaadato wada-hadallada iyo kala gurashada labada dal.
Maaddaama, waddanka Norway yahay dal dhexdhexaad ah, isla markaana leh waayo-aragnimo dheer oo ku saabsan xallinta khilaafaadka iyo nabadda adduunka” ayaa lagu yidhi warkaasi.
Hargeisa Press.com/Hargeisa Office
