Xubno ka tirsan golaha Wasiirada Dawlad Deegaanka Soomaalida Itoobiya oo uu hogaaminayay wasiirka Maalgashiga ayaa kulan la qaatay masuuliyiinta xukuumadda iyo Ganacsatada reer Somaliland.
Kulankaas oo ka dhacay magaalada Hargeysa ayaa ujeedadiisu ahayd sidii labada dawladood isaga kaashan lahaayeen arrimaha Ganacsiga iyo Maalgashiga labada deegaan.
Waxana kasoo qayb galay kulankaasi dhanka Somaliland Guddoomiyaha rugta ganacsiga Somaliland, Wasiirka Maalgashiga Maayir ku xigeenka caasimadda iyo qaar ka mida Ganacstada waaweyn ee Somaliland. Dhanka dawlad deegaan kana waxaa kamid ahaa ahaa masuuliyiinta ka socotay Wasiirka Maalgashiga, Wasiir ku xigeenka Maaliyadda, Wasiir ku xigeenka warfaafinta, Guddoomiyaha rugta ganacsiga dawlad deegaanka, iyo Meeyarka degmada Wajaale ee dhanka Itoobiya.
Guddoomiyaha rugta ganacsiga Somaliland Jamaal Caydiid ayaa sheegay in masuuliyiintu ay ka wada hadleen danaha labada dal, waxa uu sheegay inay masuuliyiinta dawlad deegaanku u yimaadeen inay Itoobiya ku marti qaadaan Ganacsatada reer Somaliland iyadoo arrintaasi ay ka aqbaleen. Islamarkaa lays waydaarsan doono Maalgashiga labada dhinac.
Wasiirka Maalgashiga Somaliland Maxamed Axmed Cawad ayaa soo dhaweeyay wasiirada dawlad deegaanka waxanu uga mahad celiyay booqashada ay ku yimaadeen Somaliland, Wasiir Cawad waxa uu sheegay in Ganacstada Somaliland ay ku dhiiri galinayaan dhanka Maalgashiga, madaama dawlad deegaanka Itoobiya iyo Somaliland ay ka dhexeeyaan wax badani.
Cabdisalaan Yuusuf Wasiirka Maalgashiga ee Dawlad Deegaanka Soomaalida Itoobiya ayaa dhinaciisa sheegay in socdaalkoodu ku wajahnaa sidii Ganacsatada waaweyn ee reer Somaliland ay u maalgashan lahaayeen dawlad deegaanka, waxaanu sheegay inay shir dambe ku qaban doonaan magaalada Jigjiga dabayaaqada bishan January iyadoo ay ganacsatada Somaliland usoo bandhigi doonaan fursadaha Maalgashi ee ka banaan dawlad deegaanka.
