IIsuduwaha wasaaradda caafimaadka Somaliland ee gobolka Sool Dr. Maxamuud Khaliif Faarax, ayaa manta xadhiga ka jaray xarun caafimaad oo laga hirgeliyay deegaanka Samo-kaab ee gobolka Sool.
Mashruucaasi ayaa qayb ka ah mashaariicda horumarinta dhinaca caafimaadka ee ay xukuumadda Somaliland ka hirgelinayso deegaamadda gobolka Sool.
Deegaanka tuullo Samo-kaab ee MCH-kan laga hirgeliyay ayaa ka tirsan degmadda Yagoori ee gobolka Sool, halkaasoo aanay hore uga jirin wax adeegyo caafimaad ah. Kaasoo ay baahi weyn u qabeen bulshadda deegaankaasi.
MCH-kani ayaa laga maalgeliyay miisaaniyadda wasaaradda caafimaadka Somaliland waxaanu ka mid yahay balan qaadyadii uu madaxweynaha Somaliland hore ugu balan qaaday in deegaankaasi laga hirgelin doono xaruntan caafimaad.
Isuduwaha wasaaradda caafimaadka Somaliland ee gobolka Sool Dr. Maxamuud Khaliif Faarax, ayaa kula dar-daarmay bulshadda deegaankaasi in ay ilaashadaan xaruntan caafimaad ee loo hirgeliyay.
Waxaanu uga mahad celiyay madaxweynaha Somaliland iyo wasiirka caafimaadka oo miisaaniyadda dawladda ugu daray hirgelinta dhismaha xaruntan caafimaad.
Geesta kale odayaasha iyo waxgaradka deegaanka tuullo Samo-kaab ayaa ka mahad celiyay cid kastoo ka qayb qaadatay hirgelinta MCH-kani gaar ahaana madaxweynaha Somaliland Muuse Biixi Cabdi.
Dhismahani ayaa ka kooban afar qol, musqullo ama suuliyo iyo dayrkii xaruntaasi. Kaasoo ay sheegeen inuu noqonayo kii u horeeyay oo ay Somaliland ka hirgeliso deegaankaasi.
